Assalomu alaykum, hurmatli madaniyat va san’at fidoyilari!
Aziz mehmonlar, muhtaram yurtdoshlar!

Bugun barchamiz uchun qadrli – ma’naviyat, did va qalb go‘zalligining timsoli bo‘lgan soha vakillari – madaniyat va san’at xodimlarining kasb bayramini keng nishonlamoqdamiz. Ushbu qutlug‘ sana bilan sizlarni chin qalbimdan samimiy muborakbod etaman!
Madaniyat – bu xalqning ruhi, san’at esa uning yuragidir. Siz, azizlar, ana shu ilohiy uyg‘unlikni jamiyatga, ayniqsa, yosh avlod qalbiga singdirib, yuksak axloq, estetik tarbiya va milliy qadriyatlarimizga hurmat ruhida tarbiyalab kelmoqdasiz.
Davlatimiz rahbari tomonidan sohani rivojlantirishga qaratilayotgan e’tibor va g‘amxo‘rlik tufayli viloyatimizda teatrlar, madaniyat markazlari, bolalar musiqa va san’at maktablari faoliyati kengaymoqda, ijodkorlar uchun yangi imkoniyatlar ochilmoqda.
Sizlarning zahmatli faoliyatingiz tufayli jahon e’tirofiga sazovor qadimiy sivilizatsiya beshigi sanalgan Samarqand bebaho meros sifatida saqlanib qolmoqda. Zamonaviy sahna asarlari, musiqiy chiqishlar va amaliy shakllar orqali keng targ‘ib qilinmoqda.
Hozirgi kunda viloyatimiz xalqaro miqyosdagi yirik madaniy, ilmiy va ijtimoiy tadbirlarga muvaffaqiyatli mezbonlik qilayotgani xalqaro maydondagi nufuzimizning oshib borayotganidan dalolat beradi. Bu esa barqaror infratuzilma, tinch muhit va xalqimizga xos mehmondo‘stlik fazilatlarining amaliy ifodasidir.
So‘nggi yillarda o‘tkazilayotgan festival, forum va anjumanlar mintaqaviy hamkorlikni mustahkamlash bilan birga, ijod ahlining xalqaro maydondagi ishtirokini kengaytirmoqda. Ushbu jarayonda sizning hissangiz beqiyos.
Samarqand bugun global madaniy muloqot va ijodiy tajriba almashinuvining muhim markazlaridan biriga aylanib bormoqda. Bunda teatr jamoalari, san’at arboblari, o‘qituvchi-murabbiylar hamda yosh iste’dod egalari faol qatnashayotgani alohida e’tiborga loyiq.

Muhtaram Prezidentimiz ta’kidlaganlaridek:
“Madaniyat – bu hayot. Uni yurakdan his qilgan xalq – hech qachon yengilmaydi.”
Bu hikmatli so‘zlarda butun ma’naviy siyosatimizning mazmuni mujassam. 
Hurmatli ijodkorlar!
Sizlarga sihat-salomatlik, cheksiz ilhom, baxt va farovonlik, ijodingizda esa ulkan yutuqlar tilayman!
Bayramingiz muborak bo‘lsin!